Xukuumadda Oo Si Rasmi Shaaca Ugu Qaaday In Ay Ka Noqotay Wada Hadaladii Soomaaliya

Hargeysa (Rajonews)  Apr, 19, 2012- Xukuumadda Somaliland, ayaa maanta daboolka ka qaaday in ay ka noqotay wada hadaladii la qorsheeyay in ay la gasho dawlada federal-ka Soomaaliya illaa inta  guddida wada xaajoodyada laga saarayo xubno ka socda maamul goboleedka Puntland.

 Wasiirka arrimaha dibeda Somaliland Dr Maxamed Cabdilaahi Cumar oo maanta xarunta wasaarada ku hadlay shabakeda wararka Ramaasnews iyo Telefiishanada  Royal tv iyo Universal, ayaa ku eedeeyay madaxda xukuumadda Soomaaliya in  ay xubno dheeraad ah oo aan qayb

ka ahayn wada hadaladii labada dhinac in ay ku dareen dhinacood, iyada oo  ay  taasi  meesha ka saarayso wadahadaladii dhexmari lahaa Somaliland.

“ Waxa ay masuuliyiinta dawlada KMG ah    ay ku dareen  guddidooda xubno kale oo dheeraad ah  oo runtii baalmarsan sidii ku talagalku ahaa iyo arrimihii aas-aaska u ahaa  in  labada geesood ee Soomaaliya iyo Somaliland ay wada hadlaan,  arrimo baalmarsan ayaa ka muuqday in Madaxweynaha KMG ah soo saaray. Waxa aanu u aragnaa arrimo carqaladayna in wada hadal wanaagsani uu dhex maro sidii ay beesha caalamku ku baaqday labada geesoodna ay ogolaadeen in uu dhexmaro Somaliland iyo Soomaaliya. Waxa aan ugu baaqaynaa in arrintaas laga noqdo oo ay ku koobnaato Soomaaliya iyo Somaliland oo u wada hadlaya qaabkii markii  hore lagu heshiiyay, waxaana aan anagu halkan ka cadaynaa in aanan ka qaybgalayn wada hadalada hore loo shaaciyay , haddii aanu Madaxweynaha   dawlada KMG ahi wax ka badelin go’aamada ay ku sii fidinayo guddida” ayuu wasiirka arrimaha dibeda Soomaaliya.

 Laakiin waxa uu sheegay Dr Maxamed Cabdilaahi Cumar in Somaliland ay  ixtiraamayso maamul goboleedyada ka jira  Soomaaliya, hase  ahaate ay ka soo horjeeda in ay qayb ka noqdaan wada hadalada Somaliland iyo  Soomaaliya.

“  Ixtiraan ayaanu u haynaa maamul goboleedyada ka jira Soomaaliya , hadday tahay  Puntland, Gal-Mudug   iyo hadday yihiin kuwa kale.laakiin heshiishkan iyo wada hadalani waxa ay ahaayeen,  kuwo qeexan cida ka qaybgalaysaa, waxa weeye dawlada Somaliland iyo dawlada KMG ah ee ka jirta Soomaaliya ama  ta  ka dambaysa ee la filayo in dhalato bisha August ee sannadkan”

 Somaliland waxa ay ka biyo diiday laba wasiir oo ka tirsan maamulka Puntland oo ka mid noqonaya xubno guddida Soomaaliya ee wada hadalada,kuwaasoo midkood ka soo jeedo Bariga Somaliland,iyada oo ay haddii ay xukuumaddu ugu ogolaato in   xagga Soomaaliya  uu ka soo jeesto  Genearal  Cabdilaahi Ilka-jiir ay taaso caqabad ku noqon doono  dadaalka ay Somaliland ku doonayso in  ay dib gacanteeda ugu soo celiso dhulka ka maqan.