Djibouti Ee Hal Milyan Oo Dollar Ugu Deeqday Biyo-Xidheenka ETHIOPIA , Noqotayna Dalkii Labaad Ee Ku Biira Somaliland Oo Hore Qaadhan Ugu Yaboohday .
Djibouti (Rajonews) Apr, 22, 2012- Dawladda dalka Djibouti, ayaa ETHIOPIA lacag dhan hal Milyan oo Dollar-ka Maraykanka ugu deeqday, taasoo gacan kaga gaysanayso dhismaha Mashuuraca Biyo -Xidheenka ETHIOPIA ee Abai, oo ay Balaayin Dollar ku baxayaan.
Guddoomiyaha maamulka Dakedaha ee Djibouti Abubakar Cumar Haddi, ayaa cheque ay ku qoran tahay lacag dhan hal Milyan oo Dollar-ka Maraykanka ah ku wareejiyey safiirka ETHIOPIA u fadhiya dalkaas Ambassador Suleyman Dedefo.
"Tani waxa ay ka tarjumeysaa wixii tabarteenna ah ee aanu ku biirineyno mashruucan ballaadhan," ayuu yidhi Abubakar oo ku hadlayey magaca dowladda Djibouti
Mashruucan oo ay ku baxayso $4.8 bilyan oo dollarka Mareykanka ah, dhismahiisa waxaa iska kaashanaya dawladda ETHIOPIA iyo shacabkeeda.
Djibouti , ayaa noqonaysa dalkii labaad ee lacag intaa leeg ku biiraya mashruuca dhismaha Biyo Xidheenka Dib-u-curashada ETHIOPIA,iyada oo bishii laga bilaabay qaadhaan lacageed oo Biyo-Xidheenka lagu taageerayo.
ETHIOPIA ayaa Djibouti u dhoofisa koronto qiyaasti ah 35 megawatts, taasoo bil kasta ay ka soo xarooto lacag dhan $1.5 milyan oo dollarka Mareykanka ah.
Dalalka gobolka, ayaa rajeynaya in Biyo- Xidheenkan uu wax badan ku soo kordhin doono horumarka guud ahaan gobolka Geeska Afrika ETHIOPIA ayay u qorsheysan tahay in ay korontada gaadhsiiso dhammaan dalalka gobolka.
No comments:
Post a Comment